តើព្រះពុទ្ធ ចែកមនុស្សជាប៉ុន្មានពួក?

[ភិក្ខុ​​ឧត្តមបញ្ញាបទីបោ]

ព្រះពុទ្ធបានចែកមនុស្សជា ៥ ពួក ផ្សេងៗគ្នា​ គឺ៖
១.​ មនុស្សនេរយិកោៈ មនុស្សដូចសត្វនរក បានដល់មនុស្សដែលប្រព្រឹត្តអំពើ អាក្រក់លាមកថោកទាប ដូចជាប្រព្រឹត្តអំពើមនុស្សឃាត អសីលធម៌។
២. មនុស្សបេតោៈ មនុស្សដូចសត្វប្រេត បានដល់មនុស្សដែលមាន​ចិត្ត​លាមកលោភលន់, ខឹងឆេវឆាវ, វង្វេងយល់ខុសជាត្រូវ ត្រូវជាខុស, រស់នៅក្រៅ​សង្គម, ត្រូវសង្គមទាត់ចោល ,រស់នៅតែឯកឯង មានសេចក្តីទុក្ខ​វេទនាឥតស្រាកស្រាន្ត ប្រៀប ដូចរស់នៅកណ្តាល ស្លាប់ពាក់កណ្តាល។
៣. មនុស្សតិរច្ឆានោៈ មនុស្សដូចសត្វតិរច្ឆាន បានដល់មនុស្សដែលខ្វះហិរិ ឱតប្បៈ គឺប្រព្រឹត្តបំពារបំពានឈ្លានពានមនុស្សផងគ្នា ឥតត្រាប្រណី។
៤. មនុស្សមនុស្សោៈ មនុស្សជាសត្វមនុស្ស គឺមនុស្សដែលយល់ស្គាល់​មនុស្សធម៌, សុជីវធម៌, សីលធម៌, ស្រលាញ់ពេញចិត្តសង្គមមនុស្ស មាន​មេត្តាអាណិតអាសូរ មនុស្សជាតិផងគ្នា មិនប្រកាន់ឋានៈយសសក្តិវណ្ណៈ។
៥. មនុស្សទេវោៈ មនុស្សជាទេវតា ឬដូចទេវតា បានដល់មនុស្សដែលមាន ទេវធម៌គឺ ហិរិ ឱតប្បៈ សទ្ធា សីល ចាគៈ សុត្ត បញ្ញា។